الرئيسية » سوالف جهراوي » وعسى ان تكرهو شيئا وهو خير لكم

قال تعالى :

وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ” [البقرة: 216]

هذه قاعدة قرآنية ومنهج حياة .. لو تدبرها أحد لأحس بالسعادة والطمأنينة في داخله ومن حوله.

وخصوصا في هذا الزمن المتوتر الاحداث دائما .. فينقل هذا التوتر لنا ولمن حولنا .

ومن باب التدبر لهذه الاية دائما .. حدثت لي قصة عجيبة هذا اليوم .. ولكنها بدأت منذ الامس بدون أن اعلم.

ورايح ابدأ معاكم القصة بلا تأخير :

—–

أمس الاربعاء وانا طالع من الدوام جاني اتصال من احد الزملاء

يقولي جهراوي لقيت بوكك بالمكتب ناسيه عندنا

وطبعا ( البوك = المحفظة ) فيه فليساتي و( بطاقات البنك )  والاثباتات

قلت خله عندك  ما فيني شده ارجع وانا بطريقي لمسقط راسي الجهراء بكل شوق ومحبة

وراح اخذه منك باجر بالليل

شنو المشكلة نقعد يوم مفلسين شبيصير يعني!

وانتهت القصة ..

لا بل بدأت

رديت البيت وأخذت لي كم مشوار ليلي بالمنطقة وبعدها نمت قرير العين هذه الليلة بكل اطمئنان وراحه  وانا مفلس ولا املك في جيبي الا نص دينار لقيته طايح بالسيارة .. وطبعا تبرعت فيه علشان ما احاتيه طوال الليل ..

المهم ثاني (يوم الخميس) قعدت على صلاة الظهر << طبعا مصلي الفجر وحاضر درس بمسجد الشيخ عبدالمحسن علشان ما تقولون اني سحبت ع الصلاة وعندكم الشيخ اسألوه :|

المهم قعدت على رسالة من البنك تقول دش برصيدك 3000دينار << أحلى رسالة

طبعا ما راح اقدر اشرح لكم شعوري  وقتها وخصوصا انها مو وقت رواتب

بس كنت انتظر قريب من هالمبلغ من الدوام بينزلونه لي في هالايام  خبركم اوفر تايم العيد والزياده الاخيرة بأثر رجعي

فعلى طول قلت زين نزلوه قبل الويك اند ..

يمدينا نصرفه ونصكر بعض الالتزامات .. منها مدرسة العيال

بس تذكرت انه بوكي ناسيه بالدوام وفيه بطاقاتي البنكية كلها

حاشني احباط << هني الحبكة الاولى

بس سرعان ما تلاشى لما تذكرت انه عندي بطاقة قاطها بالكبت << حلوه سرعان ويلا سرحان (كبت مدفونه)

ما استخدمها كثيرا

فأخذتها بعد ما توضأت وانطلقت للمسجد  (بدون )طمئنينة من العجله علشان الحق اسحب والحق ع مدرسة الاولاد قبل لا يصكرون ع الوحده  قلت ادفعلهم وارتاح بدال هالمسجات التذكيرية اللي ازعجوني فيها

وطبعا اكيد مزعجين العيال فين ابوك ما بيدفعش الرسوم ليه!!

ولخوفي انهم يتعقدون من هالسالفة قلت لازم ادفع لهم واريحهم وارتاح.

المهم صلينا ولله الحمد والشكر.

وبعد ما طلعت تذكرت اني ناسي رقم هالبطاقة << تذكرت ناسي!! هذي شلون نصرفها! المهم هذي الحبكة الثانية

فقلت خلني اجرب وادق ع البنك بالتلفون واجرب الارقام اللي حافظهم واذا فتحت اروح اسحب بدال ما اطق درب واتوهق بالمدرسة  على جهاز الكي نت << علشان تعرفون انها مدرسة متطورة مو اي شيئ

دقيت ع البنك .. اول محاوله .. الثانية … الثالثة صحيح الرقم  بس قالى انه البطاقه منتهية من شهر 6 الماضي …

قلت يالله نغير الوجهه من مدرسة الاولاد إلى البنك نسحب منه كاش وناخذ البطاقه الجديدة.

ادري طولت الموضوع

بس صدقوني لليلحين ما دشينا بالاكشن

اكمل ويلا لا؟  << هذي ما يحبها ولد عمي ضاري متعقد منها يقول حط شده وكسرة بدال كتابة ويلا قلتله لا ما بي بخليها مريحه بدون شد ولا كسر

ها ؟

طيب اكمل علشانك انت بس ياللي قلت كمل  :)

المهم دشيت البنك وبما اني من العملاء اللي تحت الهوامير  مباشرة وفوق النويبي بمراحل في البنك معطيني بطاقة التميز

وعلى طول للمكتب الخاص بالعملاء المميزين  بس كالعادة متروس جهراويه واحد فوق الثاني ماكو كرسي فاضي ..

واجد مثل حالتي

الله يرحم ايام قبل الكوادر كنت دايما القى هالمكتب فاضي :)

قلت اخذ رقم وانطر يفضى لي كرسي ..

وخلال الانتظار اشوف واحد يدش ويسلم عليه ويفضون له مكان ويجلس على ابو انه ضابط ولابس رسمي <<الجهراوية يعظمون الضباط دائما لو انه يكد الدحال

وانا توه يقولي انطرني شوي << اللي ما يعرفك ما يثمنك ما يدري عندي الفين بتويتر

طبعا شلتها في قلبي وقلت بسيطه واحد ما يأثر ..

مالكم بالطويله فضى مكان جان البق فيه عنده بالمكتب

وقعدت انطر يمشى المميزين اللي عنده واحدا تلو الأخر وانا جالس :(

ليما خلصو ,,,

جان يقولى امر

قلت ابي اسحب الفين  وتعطيني البطاقة الجديدة اللى معاي منتهية.

قال البطاقة من شهر 6 منتهية  وبعد 60 يوم تلغى ونردها للرئيسي فلازم اطلبها لك

اما الفلوس بعطيك الالفين بس ليش ما تسحب كل المبلغ اللي بالرصيد!! << هني صدمني بس طوفتها

قوية شكو يسحبني المبلغ اللى برصيدي!

قلتله لا بس الفين وما تقصر منطرني من اليوم وتمشي العالم حتى اللي بعدي وانا ماخذ رقم انتظار  وصاير نظامي..

قالي ملغين الارقام عندنا بالفرع  ومن تحصل كرسي فاضي اقعد وبالنسبه لماكينة توزيع الارقام انا قايلهم يلغون ارقام التميز منها بس الظاهر نسو!!

قلت مو مشكلة بمشيها

بس ليش تقول اسحب المبلغ الباقي بالرصيد وانا بس ابي الفين!

قالي سؤالي له مغزى مو عبث!

قلت شنو؟

قال مرني اليوم الصبح ابوفلان وطلب احط برصيدك هالمبلغ علشان مشروع خيري موصيك عليه .. ولو مو مشروع خيرى كان ما عطيته رقم حسابك ودخلت المبلغ

لانه جاني ماعنده بيانات غير اسمك!!

قلت يعني هالمبلغ مو من الدوام من ابوفلان!!

قال اييه

قلت سبحان اللي خلاني انسى بطاقات السحب بالدوام امس

واللى  خلى بطاقتي هذي منتهية

علشان امرك غصب

وإلا كان  سحبت المبلغ من بره برا   وطيرته .

شيئ عجيب  شلون ترتبت الامور حتى اعرف انه هالمبلغ مو لي ولا اصرفه.

سبحان الله

تضايقت اني نسيت البوك

وتضايقت انه بطاقتي منتهية

واني ما راح اللحق ع المدرسة

لكن طلعت الامور بالنهاية خيره.

انتهت القصة وتبقى العبرة

وهي

هكذا الحياة  تمرك حوادثها فترى انها شر ولكن في باطنها الخير الكثير

ولا يخفى علينا قصة ام موسى عليه السلام عندما القته في البحر

وقصة يوسف عليه السلام مع ابيه يعقوب عليه السلام

وقصة الغلام مع الخضر

وقصة أم سلمةلما توفى زوجها : أبو سلمة رضي الله عنهم جميعاً

تقول أم سلمة رضي الله عنها: سمعت رسول الله صلى الله عليه وسلم عليه وسلم يقول:

(ما من مسلم تصيبه مصيبة فيقول ما أمره الله إنا لله وإنا إليه راجعون اللهم أجرني في مصيبتي واخلف لي خيرا منها. إلا أخلف الله له خيرا منها).


قالت: فلما مات أبو سلمة، قلت: أي المسلمين خير من أبى سلمة؟ أول بيت هاجر إلى رسول الله صلى الله عليه وسلم عليه؟ ثم إني قلتها، فأخلف الله لي رسول الله صلى الله عليه وسلم عليه!

والقصص كثيرة  والعبر فيها كبيره ..

والمطلوب هو أن يتوكل المسلم على الله ويبذل ما يستطيع من الأسباب المشروعة

فإذا وقع شيءٌ على خلاف ما يحب فليتذكر هذه القاعدة القرآنية العظيمة:

{وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ} [البقرة: 216]}.

تمت 8/10/2011

- اخوكم جهراوي @jahrawi

 

وانتظرو الموضوع القادم ان شاء الله وقصتي مع شركة طيران فلاي دبي.

7 تعليق so far.

  1. سعود قال:

    قصة مشوقة يا اباعثمان – وانا كتبت لك بس اسمي الاول ابيك تفكر من انا

  2. jahrawi قال:

    وهل يخفى القمر يا بو عبدالله :)

    أنت من اكثر اصدقائي إيجابية ومشاركاتك دائما بهدوووء.

  3. بومبارك قال:

    قصة عجيبة وفوائده كثيره

    وهناك فائده لم تذكرها وهي محافظتك على اذكار الصباح والمساء وهي لها دور اساسي بتسخير الامور لك وهذا من فضل ربي لمن يشاء من عبادة والله لا يحرمك الأجر يا بوعثمان .

  4. jahrawi قال:

    صحيح بو مبارك
    الله يجعلنا وإياكم من الذاكرين الشاكرين .

  5. ابو ضاري قال:

    قصة جميلة
    وفيها عبرة ( ام محمد)

  6. حسن برجس قال:

    الله يوفقك يابوعثمان بأول مقال وبصراحه روعه وانا اقرأ القصه قاعد اتشوق من شطر ل شطر واسلوب راقي لايخلوا من الفكاهه والقفشات اللذيذه السهله الممتنعه وراح ننطر مقالتك القادمه بلهفه وربي مو مجامله بس اسلوب وتسلسل بالاحداث جميل ومشوق وبجد المقاله تصلح بزاويه في جريده مقروءه
    الله يوفقك
    وننطر جديدك
    وابشر بالعوض وعندي لك من ال ١٠٠ الى ال ٣٤٠٠ هي اللي برصيدي  

  7. ابوسلطان قال:

    المقال عجيب واشك انه يكون الاول




تحديثات تويتر

لايوجد رسائل من تويتر

أكثر مشاهدة

وعسى ان تكر

قال تعالى : " وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ ...

تعلم تويتر

    دورة التويتر من التاسيس إلى الاحتراف بملف واحد بي دي اف http://www.jahrawi.com/up/twitter/twitter_world.pdf  أو http://www.swtyat.com/twitter/twitter_world.pdf   وللحصول على ملف ...

مسلم يتصل ع

  httpv://www.youtube.com/watch?v=m9SG6EA_5_E

قصيدة رحم ا

httpv://www.youtube.com/watch?v=ZDkMlWAMeQk قصيدة رحم الله اباحفص عمر رضي الله عنه.   كنتُ ليلاً مع ...

شرح جيلبري

شرح جيلبريك غير مقيد 4.3.1 - 4.3.2 - 4.3.3 jailbreak   httpv://www.youtube.com/watch?v=7REyhDpWQnc

الاعلانات

  • .
  • 1
  • Website and logo design contests at DesignContest.net.
  • تابعني على تويتر

صفحتي في الفيس بوك